Darparwch Amser Stori BookTrust Cymru gwych
Dyma rai awgrymiadau er mwyn gwneud yn siŵr fod pobl yn clywed am eich gweithgareddau Amser Stori BookTrust Cymru ac yn cael profiad ardderchog wrth ymweld â'ch llyfrgell!
Chwalu'r mythau ar gyfer teuluoedd newydd
- Nod y peilot hwn yw annog teuluoedd newydd i ymweld â'r llyfrgell, Gwyddom fod rhwystrau: fe allai'r rheiny fod yn rhwystrau corfforol, neu efallai fod teithio'n broblem. Gall fod rhwystrau cymdeithasol hefyd – dengys ein hymchwil fod rhai teuluoedd yn gallu teimlo'n nerfus wrth fynd i'r llyfrgell am y tro cyntaf. I rai teuluoedd, mae gofid am orfod talu ffioedd annisgwyl, neu ofn y bydd eu plentyn yn tarfu ar bethau. Rydyn ni wedi canfod fod cysuro teuluoedd ar ôl iddyn nhw ddod i mewn i'r llyfrgell yn eu hannog i ymweld eto! Dyma bwnc y gallwch ei godi wrth drafod gyda phartneriaid cymunedol hefyd.
“Rydyn ni wedi cael trafferth erioed i gael Amser Stori a fynychir yn dda. Drwy gysylltu â’n meithrinfa leol i ymuno â ni, mae gennym Amser Stori rheolaidd yn digwydd nawr, er ein bod wedi gorffen y chwe llyfr, ac mae hyn wedi annog cyswllt cadarnhaol â’r feithrinfa ar gyfer digwyddiadau eraill”
Gweithio gyda phartneriaid (fel canolfannau plant a meithrinfeydd) i gyrraedd at deuluoedd newydd
Gwyddom y gall gymryd amser i adeiladu perthynas â theuluoedd newydd. Dyna pam y gellir darparu peilot Amser Stori BookTrust Cymru ar adeg sy'n addas i'ch llyfrgell chi drwy gydol 2023.
Efallai yr hoffech gysylltu â meithrinfeydd lleol, grwpiau baban a phlentyn, a lleoliadau blynyddoedd cynnar eraill. Gall gweithio gyda phartneriaid sydd eisoes wedi adeiladu ymddiriedaeth gyda theuluoedd beri eich bod chi'n achub y blaen wrth hybu eich digwyddiadau.
Lledu'r gair
- Defnyddiwch bosteri Amser Stori BookTrust Cymru i hysbysebu eich gweithgareddau. Ymysg lleoedd da i'w harddangos mae archfarchnadoedd lleol, parciau a chanolfannau cymunedol. Gellir lawrlwytho posteri o'n tudalen adnoddau.
- Defnyddiwch y cyfryngau cymdeithasol i ledu'r gair! Rydyn ni'n rhannu cardiau cymdeithasol i chi eu lawrlwytho a'u defnyddio – gallwch ddod o hyd iddynt ar ein tudalen adnoddau.
“Fe ddysgon ni am y llyfrgell ar y cyfryngau cymdeithasol. Fe wnaethon ni fwynhau’r sesiwn, am ein bod ni erioed wedi bod o’r blaen. Edrych ymlaen at ddod yn ôl wythnos nesaf. Byddwn, byddwn yn ei argymell i eraill.”
Cyffro o'r dechrau
Gallech greu arddangosfeydd hwyliog a deniadol mewn cynteddau, a defnyddio sticeri llawr i lywio teuluoedd i'r ardal blant. Mae gennym bosteri y gallwch eu defnyddio yn y llyfrgell (gallwch eu lawrlwytho o'n tudalen adnoddau) hefyd!
Adnoddau hyblyg
Rydyn ni wedi cynllunio adnoddau Amser Stori BookTrust Cymru i fod yn hyblyg – er enghraifft, gellir defnyddio'r llyfrau sticeri pan fydd plentyn yn benthyca'i lyfr cyntaf, a phan fydd yn cael gwahoddiad i ddigwyddiad Amser Stori, gallai gasglu sticer ar gyfer pob llyfr.
Rydych chi'n rhydd i benderfynu sut i ddefnyddio'r adnoddau, am mai chi sy'n adnabod eich cymuned orau – ond byddem wrth ein bodd o glywed beth weithiodd i chi!
Sesiynau rhyngweithiol
- Gwnewch i deuluoedd deimlo'n gyfforddus. Gosodwch unrhyw ddisgwyliadau'n gynnar. Er enghraifft, gwnewch yn siŵr fod rhieni a gofalwyr yn deall ei bod hi'n iawn os nad yw eu plant yn eistedd yn llonydd a thawel.
- Meddyliwch am ystod oedran y plant yn y sesiwn. Os oes llawer o blant llai'n mynychu, ceisiwch rannu straeon byrrach.
- Cymysgwch bethau. Byddwch yn hyblyg – cofiwch gynnwys cyfuniad o rigymau a straeon rhyngweithiol i gynnal lefelau egni.
- Cynhwyswch y plant gymaint â phosib. Boed hynny drwy'u cael i ganu rhigwm gyda chi, gwneud symudiadau hwyliog, neu hyd yn oed droi tudalennau'r llyfr rydych chi'n ei ddarllen, byddan nhw wrth ei bodd i gael gwahoddiad i gymryd rhan.