Bardd Plant Cymru yn cyfansoddi cerdd i ddathlu 25 mlynedd o Dechrau Da

Published on: 12 Rhagfyr 2017 Author: Anna Coote

Mae cerdd newydd gan Casia Wiliam, Bardd Plant Cymru, yn dathlu 25 mlynedd o Dechrau Da, rhaglen genedlaethol rhoddi llyfrau BookTrust.

Bydd Stori / Story yn cael ei rannu gyda theuluoedd ledled Cymru, ac mae'n disgrifio pa mor arbennig gall yr amser a dreuliwn yn darllen gyda'n gilydd fod, neges sydd wrth galon rhaglen Dechrau Da.

Lawrlwythwch eich copi chi eich hun o’r gerdd

Ers 1992, mae BookTrust, elusen ddarllen plant fwyaf y DU, wedi rhoi dros 34 miliwn o lyfrau i blant ledled y Deyrnas Unedig trwy Dechrau Da.

Nod y rhaglen yw helpu pob plentyn i gael y dechrau gorau posibl mewn bywyd a datblygu cariad at lyfrau, straeon a rhigymau. Gall pob plentyn yng Nghymru gael pecyn o lyfrau Dechrau Da arbennig pan fyddant yn 6 mis a 27 mis oed, fel arfer gan eu hymwelydd iechyd.

Helen Wales, Pennaeth BookTrust Cymru:

'Rydym wrth ein bodd bod Casia Wiliam, Bardd Plant Cymru, wedi ysgrifennu cerdd i ddathlu Dechrau Da. Mae rhannu rhigymau yn rhan mor bwysig o Dechrau Da ac mae mor bwysig i helpu plant i ddatblygu sgiliau iaith pan fyddant yn ifanc i ddod yn ddarllenwyr a siaradwyr hyderus.

'Mae hon yn gerdd wych i deuluoedd gyda phlant ifanc iawn - mae'n hwyl ac yn hawdd ymuno gyda hi. Rydym yn annog pawb i'w rhannu â phlentyn ifanc yn eu bywyd!'

Caiff sesiynau Amser Rhigwm ac Amser Stori rhad ac am ddim eu cynnal mewn llyfrgelloedd ledled Cymru, a gall teuluoedd fwynhau straeon a rhigymau gyda'i gilydd mewn ffordd hwyliog a hamddenol.

Casia Wiliam, Bardd Plant Cymru:

'Roeddwn wrth fy modd pan daeth Dechrau Da Cymru ata i yn gofyn am gerdd i ddathlu’r pen-blwydd arbennig. Fe ges i fachgen bach y llynedd ac mae'r llyfr rhad ac am ddim a roddwyd i ni yn y pecyn Dechrau Da yn ffefryn mawr yn ein tŷ ni!

'Dwi’n coelio ei bod hi’n hynod o bwysig i ddechrau darllen gyda phlant o oedran cynnar; trwy rannu hud a lledrith amser stori gyda nhw, byddant yn tyfu i fod yn ddarllenwyr hyderus ac o bosib yn feirdd ac awduron hefyd.'

Mae prosiect Bardd Plant Cymru yn sicrhau bod gan bob plentyn yng Nghymru y cyfle i arbrofi gyda llenyddiaeth Gymraeg, beth bynnag fo'u gallu neu gefndir. Trwy weithdai, perfformiadau a gweithgareddau, mae'r prosiect yn cyflwyno llenyddiaeth i blant mewn ffordd egnïol, ddeinamig a chyffrous.

Mae cynllun Bardd Plant Cymru yn cael ei gydlynu gan Llenyddiaeth Cymru gyda chymorth Llywodraeth Cymru, Cyngor Llyfrau Cymru, Urdd Gobaith Cymru ac S4C.