Amelia Cheeseheart Investigates: Mummy Mayhem

Am y llyfr hwn

Mae Amelia Cheeseheart y llygoden yn byw mewn siop anrhegion amgueddfa gyda’i ffrind gorau, Webster y pryf cop. 

Un diwrnod, maen nhw’n clywed synau rhyfedd yn dod o arddangosfa Oes yr Iâ, felly maen nhw’n gwibio draw i ymchwilio. Mae’r llygod ogof yn ofidus oherwydd bod teigr ysgithrog ar goll. Yna, mae’r llygod Llychlynnaidd yn dweud eu bod nhw wedi colli trysor hefyd. Maen nhw’n cyhuddo ei gilydd o ddwyn eu heiddo gwerthfawr, ac mae brwydr ar fin cychwyn. 

Ond mae Amelia a Webster yn gwybod bod rhywbeth ar droed! A’u cyfrifoldeb nhw yw datrys y sefyllfa. Bydd arddull llyfr comics y stori hon yn eithriadol o ddeniadol i ddarllenwyr ifanc. Nid yn unig y mae lluniau lliwgar a phaneli unigryw i symud drwyddynt wrth ddilyn yr hanes, ond mae’r holl stori hefyd wedi’i rhannu’n benodau byr. 

Mae hyn yn rhoi amser i’r darllenydd newydd gymryd seibiant a myfyrio ar yr hyn sydd wedi digwydd, sy’n ddefnyddiol yma gan fod cynifer o eiliadau o berygl a chyffro. Adroddir y stori mewn swigod siarad yn bennaf, ag ambell i linell naratif, ac yn ddefnyddiol mae’r ffont yn defnyddio llythrennau mawr a bach, a llythrennau ‘a’ babanod, sy’n ei gwneud yn haws i ddarllenwyr newydd eu hamgyffred na llythrennau mawr traddodiadol nofelau lluniau. Hwyl fyrlymus!