Amazing Asia

Am y llyfr hwn

Mae’r llyfr hwn sydd wedi’i ddylunio’n hyfryd yn dathlu cyfandir mwyaf a mwyaf poblog y byd, Asia.

Mae’n rhoi manylion amrywiaeth eang o bynciau diwylliannol, hanesyddol, naturiol, a daearyddol, ag adrannau penodol yn archwilio pob un o’r prif ranbarthau tiriogaethol.  

Mae Rashmi Sirdeshpande yn defnyddio ei harbenigedd ym maes ysgrifennu ffeithiol i gynnal egni drwy gydol y llyfr cynhwysfawr hwn, gan wneud defnydd o ffeithluniau, mapiau, ystadegau, a chapsiynau bachog i ychwanegu diddordeb a dyfnder. Mae’r cynnwys testunol wedi’i gyflwyno’n dda i ddifyrru a hysbysu plant – gan gynnwys cyfeiriadau at ddiwylliant cyfoes ochr yn ochr â gwybodaeth fwy hanesyddol.  

Yn ogystal â’r wybodaeth helaeth sydd ar gael yn y llyfr hwn, mae hefyd yn brolio lluniau anhygoel a dyluniad gweledol trawiadol. Mae gwaith celf Jason Lyon yn neidio oddi ar y dudalen â chefndiroedd graddiant lliw clyfar, darluniau llawn cymeriad, a chlawr hyfryd â cherfwedd euraid wedi’i fewnosod yn gywrain. 

Mae’r llyfr hwn yn amlygu cymaint am ddiwylliant a hanes cyfoethog Asia ac yn ddewis gwych i’r rhai sy’n hoff o ffeithiau manwl a gwybodaeth.