Anzu and the Realm of Darkness

Am y llyfr hwn

Mae Anzu newydd symud adref yn ystod Obon, cyfnod i gofio cyndadau. Ond nid yw’n teimlo fel dathlu; mae’n teimlo wedi’i hynysu gan ei threftadaeth Japaneaidd, ac embaras oherwydd y plant ysgol a bigodd arni am fod yn wahanol. 

Yna, pan fo ci yn dwyn amwled ei nain, mae’n cael ei hun ar goll yn Yomi, teyrnas isfyd Shinto. Rheolir y wlad hon o dywyllwch gan y Frenhines Izanami hardd ond creulon ac mae’n llawn bodau hudolus o draddodiadau llên gwerin Japan. Mae’n rhaid i Anzu gyfuno â’r ci, sy’n gwasanaethu fel porthor, i ddinistrio Izanami a rhyddhau eneidiau plant y mae wedi eu carcharu; ond dim ond trwy dderbyn ei gwir hunan y gall hi ddatgloi’r grym i wneud hynny. 

Mae’r nofel luniau rhyfeddol o wreiddiol hon yn symud ymlaen ar garlam ac yn llawn bwrlwm. Mae arddull ddarlunio Nguyen yn ychwanegu cymeriad a manylder hyfryd at sylfeini chwedlonol y stori hon, ac efallai’n wir y bydd darllenwyr yn cael eu hysbrydoli i ddarganfod mwy am lên gwerin Bwdhaidd a Shinto. Yn ogystal â'i dilyniannau dynamig, mae’r testun hwn hefyd yn trafod themâu hunaniaeth a chynrychiolaeth yn fedrus iawn. Mae’r frwydr am y deyrnas yn gweithio fel metaffor ar gyfer trafferthion Anzu ei hun gyda derbyn ei threftadaeth yn wyneb dylanwadau diwylliannol sy’n gwrthdaro.